紅魔鬼必奪“堡” 衛冕聯賽及歐冠雙料冠軍的曼聯，今晚繼續展開季前熱身賽，對手只係低兩班的甲組球隊彼德堡，唔好話輸波，即使贏得少都會失禮一班“粉絲”，因為論球員質素、技術及班底都遠遠在對手之上，所以初盤開出紅魔要讓兩球都要捧場。 彼德堡上季只係一支乙組仔，奪得亞軍之後升上甲組，基本上仍屬於一支乙組頭甲組尾，之前踢過兩場熱身賽，分別輸畀一支非聯賽球隊及英超中游分子韋斯咸，實力確係有限公司，今仗對住歐洲冠軍，根本唔同級數，今仗當學嘢，只望輸少當贏。 曼聯開操至今踢咗六場熱身賽，雖然五勝一和入十一球只失兩球，但由於對手唔算強，所以紅魔迷應該唔收貨，但點都好，始終熱身賽目的都係要操起球員狀態及體能，大家都唔好要求過高，希望操多兩場，應該會重現王者風範。曼聯目前基本陣容變動不大，只有C朗需要養傷及安達臣去踢奧運缺陣，前中後仍然有超強實力。嚟緊曼聯將要踢今季第一項錦標“社區盾”，所以相信今仗“費蛇”會擺出比較原整陣容出戰，而且亦會全力撲擊對手，一試前線攻力如何，以朗尼、迪維斯及傑斯等組成攻力，對住次兩班的甲組球會，的確夠殺有餘，預料最低消費三球。 推介：曼聯 3:0