拜仁主場難得“米”

拜仁與國米在歐洲球譠都係屬於頂級分子，今晚兩隊碰頭踢場友誼賽，應該極具睇頭，只可惜兩隊陣中唔少星級球員都因傷缺陣，雙方實力大減情況下，預料今仗和波居多，邊隊受讓捧邊隊一定有着數。

今季由奇連士文執教的拜仁，大致上都係原班人馬，實力是否強勁真係見仁見智，就以拜仁最近三場比賽而論，能否挑戰歐洲賽事，其實並不樂觀，首先在德國超級盃敗於多蒙特腳下，跟住友賽普通級球隊科隆只係悶和○比○，擊敗日本的浦和紅鑽算係似返隊波，睇怕“奇哥”都要花點時間去執番班波。至於今晚場波亦有多名主力缺陣，包括對浦和紅鑽受傷的王牌射手盧卡東尼，以及剛做完手術的中場靈魂列比利，所以陣容不整的拜仁，即使有主場之利都未必可以贏波。

國米今季由我偶像摩連奴“揸弗”，當然希望可以在歐洲賽稱王稱霸，不過，人腳方面暫時都冇乜驚喜，期望“老摩”再注入兩三個極具級數球星加盟，令球隊實力更加強橫。講返今晚場波，國米今仗同樣都係殘陣出擊，皆因伊巴謙莫域、韋拉、捷禾、馬達拉斯、列高巴、森姆爾等都係“十字軍”，所以原本一場精彩重量級大戰，變成天殘鬥地缺，分分鐘會係悶波一場。

推介：和波 0：0