曼聯讓唔起史篤城 繼輸畀利物浦之後，曼聯上周聯賽又畀另一勁敵阿仙奴打低，衛冕英超接連受阻滯，為免畀三大死敵拉開距離，打後比賽確係不容有失，今晚主場迎戰升班馬史篤城，由於實力太過懸殊，根本冇得輸，問題係贏多定贏少。但老實講，初盤開出曼聯要讓到兩球／兩球半，真係當對手唔識踢波咩。史篤城就算輸都要輸得好好睇睇，絕對唔會畀班“魔星”大肆羞辱。 冇錯，睇人腳，曼聯攻力的確有保證，但都要睇腳風順唔順，C朗拿度近期所謂百步穿楊的罰球走晒樣；朗尼上仗對利物浦三番四次浪費黃金機會；貝巴杜夫的表現又一時時，今仗對住必打密集防守的史篤城未必贏得多。史篤城知道自己班波有幾多料，要贏曼聯根本係妄想，博和或者輸少當贏已經可以向“粉絲”交代，記得早前史篤城作客利物浦踢九○一戰術，搞到紅軍老鼠拉龜冇晒計，上仗主場更攻陷阿仙奴，近三仗錄得兩勝一和，點都對士氣有幫助，今晚一於照辦煮碗，實行守到你暈，曼聯要贏三球先有錢收，邊有咁鬼易。 推介：曼聯勝2：0